世事嘅嘢就係咁奇，當你以為已經見盡世事有幾咁光怪陸離時，身邊總會發生一啲出人意表嘅事，真係估佢唔到呀！就好似有位靚爆模特兒有個特殊身份；情趣按摩棒內有乾坤；仲要有個索女竟大街大巷玩半裸。你話人生在世，係咪分分鐘都有驚喜先？
想學到嘢要搵個名師嚟教係常識，若然個名師係個樣靚身材正嘅模特兒，認真度一定幾何級數咁上呀！唔信有模特兒咁勁？梗係有啦！佢咪就係專業跳傘教練Anais Zanotti囉！專攻自由式跳傘嘅佢，來頭就認真犀利，事關今年29歲嘅佢先後為《花花公子》、GQ、Maxim等雜誌拍過性感寫真，更喺各大雜誌封面亮相超過35次。佢之所以搖身一變成為專業教練，事緣一次朋友拉佢去玩，結果佢迷上當中嘅刺激感，至今已經累積超過1,350次從飛機跳傘經驗，絕對係個資深跳飛機專家。不過要提提大家，跳傘時嘅佢必定身穿專業傘衣，換言之即係包到超密實，想睇到佢火辣身材睇怕都冇乜機會。
外國人嘅思想有時真係前衞到令人難以接受，試諗吓有邊個人會諗到，將過咗身嘅老公骨灰，變身成老婆閨中情趣按摩棒呢？想知道點解會有人有咁出位嘅諗法，就要問吓呢位荷蘭設計師Mark Sturkenboom。佢解釋呢支按摩棒，其實係一款名為「21 Grams」嘅白色手工木製紀念盒其中一部分，而按摩棒嘅原意，係希望讓使用者將至愛嘅骨灰放入按摩棒內，然後喺使用時可以感受到對方嘅存在。不過好老實咁講，試問有邊個失去至愛嘅女士，仲有心情拎住支骨灰按摩棒嚟玩呀？睹物思人就聽得多，睹物思淫就係首次。
開餐廳嘅人最怕遇到乜嘢客？咪就係食霸王餐嘅人囉！遇着佢哋真係好谷氣，最怕就係佢大聲吵鬧阻住做生意，就真係人都癲！馬來西亞就有位32歲嘅女人食霸王餐不特止，被店員攔住嘅佢嘈嘈吓突然除咗件衫半裸示人，仲喺度熱身話要同店員隻揪，跟住大搖大擺離開。好彩店家醒目識報警，最後警察拉咗佢後進行尿檢，發現佢曾經吸毒，而女事主就話對當時情況一啲都冇印象。本嚟成件事嘅焦點應該係話個女人唔應該食霸王餐，點知唔少網民卻將焦點集中喺佢嘅樣貌同身材上，原來有網民話喺事發現場見到個女人，佢嘅樣貌同身材都相當正喎！其實靚又點剝衫又點，最重要係佢個格真係唔掂呀！
撰文：魂