俗語話有老婆梗係好過食自己，但喺英國就反而多人鍾意食自己拒絕同伴侶行房，奇怪！內地鑑於車展當中嘅車模衣着過於暴露，限制今年上海車展唔能夠有車模，而另一邊廂曼谷嘅車展，一眾車模就互相爭妍，令現場「胸」光閃耀。返學除咗可以睇教科書，老師仲會播放教學影片畀同學仔睇增加知識，但日本九州一間學校播播吓變咗播AV片，唔通想加插性教育知識？
早年有調查話香港人性生活質素低下，行房次數不足，不過英國呢類先進歐洲國家，大家以為佢會好開放咩？其實絕對唔係，早前英國有報道指，年齡介乎16至44歲嘅有伴侶人士，每月平均做愛只有3次，比起二十年前嘅每月平均5次仲要少！有伴侶都唔享受閨房之樂，難道患上性冷感？數據指只有百分之五嘅成年男人，過去五年有試過嫖妓；又發現年齡介乎25至35歲，同樣都係有伴侶嘅男人當中，有四分之三每周平均自娛四次，咁即係冇患上性冷感啦，莫非嫌棄伴侶？
如果有留意內地嘅車展，都會發覺愈來愈好睇，我唔係話展出嘅各款名貴車款，而係現場出現嘅車模！呢班車模美艷、身材好，為咗爭取觀眾注目，更加不惜性感上陣，除咗三點，幾乎所有身體部位都露晒出嚟畀大家睇，搞到入場人士睇女多過睇車，亦同時被認為形成歪風。既然此風不可長，內地有關當局就狠下禁令，今年上海車展唔可以有車模，至於是否上有政策，下有對策，暫時不得而知。然而，近期泰國嘅第36屆曼谷國際汽車展覽就同以往嘅內地車展一樣，索爆車模處處可見！呢批泰國車模無論樣貌定身材都一流，衣着亦性感非常，大部分都酥胸半露，令人睇到目瞪口呆！睇嚟下屆我都要去觀摩一下喇。
讀過書返過學嘅朋友都知道上堂其實幾悶，小弟以往返學十堂就有八堂見周公多過見老師喇。為咗提升學生嘅學習興趣，好多老師都會各出奇謀，最常用嘅就係播片，為大家提供一個書本以外嘅學習途徑，之不過最近日本就有位教授播片播出事喇。事件發生於九州大學農學研究院一個教學室，當日有近百名學生上堂，教授講完第一節之後就將個人電腦連接到投射機播片畀大家睇，點知播播吓見到一段AV，唔通呢位教授了解到耕田同「造人」道理有異曲同工之妙？段AV播咗成30秒教授至發現，隨後急急停播再繼續上課，至於教授有咩後果就未有消息公布。
撰文：賢