如果話檸檬係香港代表性水果之一，相信冇乜人會反對。皆因喺餐廳用膳時嚟杯檸檬茶，已經係唔少人嘅指定動作，而唔少中菜更會用到檸檬。除咗飲食方面，情色世界中亦有唔少詞匯亦同檸檬及Lemon有關，就算喺AV界亦可以發現到佢嘅蹤影！
「Yaoi Lemon」呢個詞語好古怪，皆因「Yaoi」其實並唔係英文而係日文，究竟係乜嘢意思呢？原來「Yaoi」一詞嚟自1970年代日本嘅女性向同人誌作品，佢哋不但鍾意改篇自人氣動漫作品，並喺當中加入男男愛情元素，亦即係我哋俗稱嘅「BL」（Boy Love）；後者「Lemon」則指男男嘅情慾場面。將兩者結合一齊後，意思即指有男男情慾場面嘅同人誌作品。據著名色情電影搜尋引擎Pornhub，喺2015年公布嘅關於用戶瀏覽習慣嘅研究指，近年女性首選嘅女女主題鹹片，其次分別為男男及青少年主題，足見女性好此道者人數並唔少。
如果想知「Lemon Squeeze」呢個俚語意思其實好簡單，按字面直譯就得，事關佢中文解做榨檸檬，心邪嘅朋友睇到個榨字就知佢一定係指一啲情趣挑逗動作啦！冇錯！佢的確係個調情嘅行為，只係榨就明白，當中嘅檸檬又係乜嘢意思呢？原來喺美國俗語中，「Lemons」係指「嘥士」偏細嘅女性車頭燈，亦即係我哋俗稱嘅「小籠包」，而加入「Squeeze」後便指以反打圈方式搓弄小籠包嘅調情動作，目的在於令女伴受到刺激，更易產生情慾嘅一種調情方法。
喺西班牙文中稱檸檬為「Limon」，而「Limon Vibrator」即係檸檬形嘅震蛋。呢個外形咁別致嘅情趣玩具，由著名情趣用品公司Minna喺2013年推出，而之所以設計到好似個檸檬咁樣，並唔係單純因為貪佢個樣夠可愛又親民，而係因為睇中檸檬尖頭嘅特性。據介紹，喺呢個全天候防水嘅檸檬震蛋內，置有一個超高速摩打，而每次充電後就可以玩兩至三粒鐘，再用一個按鈕即可調校唔同嘅震動模式，最後透過佢個尖頭更可以充分刺激女伴嘅敏感帶，輕易令女伴產生高潮，難怪被喻為可以帶畀人最大樂趣嘅檸檬！
如果以為講親四仔都係美國出品嘅話，咁就真係大錯特錯，事關歐洲有唔少國家都有自家製品，佢哋不但供應本土，亦有分銷到美國呢個巨大嘅四仔市場，而講到當中最為美國四仔迷所熟悉嘅歐製作品，就唔可以唔提呢套由意大利四仔片商Topax Film推出嘅《Anal Lemon》。呢套搵嚟多國脫星，當中包括西班牙嘅Leyla Black、巴西嘅Agata同意大利索女Nataly等嘅作品，雖然睇套片名係以暢遊後花園為題，但片中卻不乏其他「行正路」嘅曳曳場面。講到故事佢其實好簡單，只係講述一班索女喺西班牙嘅一個豪宅搞派對，結果由表白派對變咗荒淫P。
若然問邊個美國脫星同檸檬有密切關係，就一定唔可以唔提四仔天后Riley Reid。揀佢嘅原因，並非因為呢位喺1991年7月9日於美國出生嘅脫星鍾意食檸檬，而係在於佢背脊嘅紋身。唔知係佢懶醒用網上翻譯工具定係畀個紋身師跣，竟然將一句好有意思嘅英文金句「When Life Gives You Lemons， Make Lemonade」（原意思為：當生命畀到你好似檸檬苦又酸嘅磨難時，不妨換個角度將佢變成又甜又好味嘅檸檬水），直譯成「生活帶來您時檸檬做檸檬水」，將好好地一句話變成不倫不類。雖然佢後嚟知道翻譯錯咗，但仍覺呢個紋身好Cool及有宣傳作用，依然好大方地喺演出時Show出嚟。
咪以為做得AV女優嘅唔係欠落大筆街數，就係因為冇搵食技能，查實當中不乏擁有大學學歷，好似喺1989年3月27日出生嘅日本前AV女優橘檸檬，就係一個好例子。呢位喺2007年以日本AV片商WAAP專屬女優身份出道嘅女優，處女作就係著名嘅《現役合格！！東•生〈平成生出生的優等生亮相〉橘檸檬》，明眼人一睇就知所謂「東•生」即暗示為日本著名東京大學，加上佢對33E車頭燈，喺當年刮起一道女優旋風。可惜佢出道不過年幾，就喺2008年12月宣布引退。雖然佢冇講過因乜事引退，但有人分析指佢所謂嘅大學生身份未必係真，皆因從佢出道以嚟不論自己、公司同大學，都未有出嚟證實過相關事情。由於長期備受呢個問題困擾，故此佢決定退出呢個是非地喎！
撰文：魂