好多巴打除咗對生肖運程有興趣之外，原來對面相都十分關注，因為單憑肉眼就可以了解對方，所以我哋請嚟寶源師傅講解生肖之餘又講吓面相分析，等大家可以帶眼識人，而第一次就講吓邊啲男人嘅面相最容易有小三！
師傅話第一要睇對眼，如果青年時期眼睛又圓又大，眼睛裏面長期水汪汪，咁代表佢感情非常豐富，容易動情，婚前咁樣十分正常，但如果婚後，人都四十歲，但雙眼仲係水汪汪咁，就代表感情仍然豐富，如果遇上志趣相投或者需要佢保護嘅異性，佢哋就會投入過多嘅感情落去，如果對方有心，咁就好容易出事，所以女士們要留意丈夫或者男朋友，有咗你之後雙眼仲成日水汪汪嘅，就要做好監控工作，再唔係加強依賴或者培養共同興趣方為上策！
男人嘅鼻主財力同埋性能力，而想要小三嘅朋友一定係呢兩方面都有能力至會出嚟搞搞震，而鼻生得高大，大多好有主見，如果另一半鼻唔夠高挺，喺家裏面就係男人話事。此外要睇鼻頭，如果生得又圓又有肉，咁代表有賺錢嘅能力，而且有肉地，仲代表佢能把財富積累下來。
而鼻又代表性能力，鼻頭粗大有機會小弟弟亦十分粗壯，人到中年有錢之餘，仲有心有力，你話唔出嚟搞搞震都幾難，做太太嘅除咗睇緊啲，否則就設法幫佢消耗啲能力啦！
師傅話觀察男人嘅毛髮同埋眉毛都有迹可尋，男士如果天生鬈毛或體毛濃密，都係天生嘅風流鬼，呢啲男人如果畀佢哋發現獵物，佢哋點都唔會放過，而且唔係玩玩就算，有機會始亂終棄！
另外，好喜歡打理頭髮嘅男士都要小心，因為唔係喺發情期，男人打理頭髮嚟做乜？另外，眉毛生如彎月，亦係天生風流種子，喜歡追求美女。此外，眉尾上揚係生活得意嘅象徵，另一半近年眉尾上揚，但唔係因工作同家庭嘅關係，咁一定同佢哋感情生活有關！
玄學提供：寶源師傅
撰文：小德