巴打些牙:患難見真情?離婚有因由

太太患重病離婚嘅機率就會大增,唔通係做丈夫嘅忘恩負義拋棄糟糠?有專家建議將手機遠離臥室,會增加情侶性生活嘅滿意情況。日本出晒名對性事開放,最近有調查指出佢哋小學生已經交男女朋友,日日拍拖返學!

妻子患病多離異

結婚時好多新郎都同新娘子發誓,將來無論貧苦疾病等都要永不分離,但據美國愛荷華州立大學嘅研究指出,佢哋搵嚟2,700對夫婦,進行咗20多年嘅觀察,發現當太太患咗重病時,同健康夫妻比較,離婚率會上升六個巴仙,而丈夫患咗重病,則同健康夫妻比率一樣,但大家咪以為係男人忘恩負義,當中有好多例子係由患病嘅太太提出,據調查員推測太太因重病無法再照料家人,所以選擇離婚,希望丈夫盡快找人填補太太嘅位置!真係好偉大呀!

手機離身添性趣

有市場調查公司指出,年齡18至29歲嘅年輕人當中有近20%,同另一半進行親密接觸時,竟然會使用智慧型手機嘅習慣,所講嘅使用,除咗講電話、拍攝、聽歌、打機外,最多就係聽見短訊聲響時,佢哋會好自然咁攞部手機嚟翻閱,雖然整個動作只需幾秒鐘,但對另一半就會造成好大嘅打擊,所以有避孕套公司就拍廣告,鼓勵想享受性歡愉,就把手機滾出睡房,有網友話習慣手機不離身,突然將電話放出大廳,反而更加牽掛,令精神更難集中!

小學生早熟拍拖

日本人對性事特別開放,原來佢哋從小學時代就已經開始談戀愛,據日本一個網上論壇嘅調查所得,日本五、六年級嘅小學生當中,你訪問四個女生,就有一個承認自己有男朋友,百分率高達25%,問同級男生有冇戀愛經驗?六個就五個承認有過,而且仲話係由女生主動表白,但咪以為只有五、六年班嘅學生至談戀愛,低至二年班嘅學生,就已經有人向心儀對象表白過,事後有冇成功就唔知道,但小學生拍拖已經係好普通嘅事情,唯獨父母唔肯承認啫!

撰文:小德