今日係大年初九，遲就遲咗少少，但第一次見面，唔少得同各位巴打拜個年，衷心祝大家心想事成，羊年行大運！新正頭一於講啲吉利嘢，於是請師傅預測邊三個生肖嘅朋友喺羊年會貴人多多，行運一條龍！
師傅話屬羊嘅朋友今年吉星多到不得了，而且單係貴人星就有三粒，一粒「金匱」，一粒「玉堂」，最重要係有粒代表男性貴人嘅「太陽」星，所以屬羊嘅朋友今年運程好到不得了，而且貴人及機會會不斷湧現，但今年是值太歲，個人能量和自信超級爆燈，只怕過於衝動，因而做錯決定。另外要小心女人，因為肖羊嘅朋友主要得力於男貴人嘅相助，如有女貴人出現身邊，代表會把好的能量化解，令機會幻滅，好夢成空，所以今年一定要小心女人。
屬豬嘅朋友今年冇乜嘢吉星，但與太歲三合，合則指力量團結，眾志成城，代表工作上容易得到貴人嘅幫助，本身屬豬朋友嘅性格就係對朋友夠熱情、夠照顧，所以深得朋友愛戴，當有要事需要別人幫手時，他們都會義不容辭，鼎力相助，但由於朋友太多，有時會變得過於依賴，搞到朋友有時都懶得主動幫忙，所以屬豬嘅朋友今年如果有事要人幫手，貴人不會主動出現，但你只要肯放風聲出去，支持你嘅朋友和貴人都會出現，助你解決大小問題！
今年有「紫微」、「龍德」兩顆吉星相助，屬鼠嘅朋友要機會有機會，要人幫手就會有人幫手，而且所遇嘅貴人都係十分得力，乜嘢高難度嘅事都能夠解決，但有一件事要特別留意，今年屬鼠嘅朋友與太歲相害，提防有小人喺身後做小動作，對你嘅工作和人格做成傷害，你一定要及早處理，否則事情鬧大，要出動到貴人來處理呢啲小事，就會相對地影響你嘅發財大計！要集中火力喺工作上，才會得心應手，心想事成，而小人是非就要小心提防！
異性運：蛇、狗、豬
桃花運：牛、虎、羊
和合運：龍、馬、猴
撰文：小德
玄學提供：寶源師傅