男人企喺度尿尿，自然會滴濕地方，但因為滴濕地方而要賠償，你又制唔制呢？瑞典有套性教育動畫，攞晒男女架生嚟卡通化，但市民大眾反而嫌佢未夠去盡。囡囡們如果日日都要化妝出街嘅，呢單新聞一定要留意呀！
德國有單官司十分搞笑，話說有男租客畀佢個業主投訴佢企喺度尿尿時，滴壞咗洗手間嘅雲石地板，所以喺租客搬出時，拒絕退回3,000歐元嘅按金，為起嚟約二萬七千蚊港紙，租客當然不服，於是告上法庭，最後當地法官判租客勝訴，因為男人絕對有站着尿尿嘅權利，所以因為站着尿尿而引伸出嚟嘅破壞，全都屬於正常狀況，不屬故意破壞，所以不能扣減租客嘅按金。以後女友或老婆詐型尿尿射唔正，到時巴打們就要捍衞自己企喺度尿尿嘅權利呀！
瑞典電視台最近製作一段有關性教育嘅動畫短片，片長1分06秒，自今個月初放上影片分享網站後，短短幾日就有四百萬人觀看，本來十分成功，但就惹來不少劣評！動畫將陰莖同陰道卡通化，跟住配上輕鬆音樂跟住一齊載歌載舞，大家一定會以為大眾批評動畫太過出位惹嚟反感！如果巴打們咁諗就大錯特錯，當地民眾批評呢套動畫未夠出位，未夠前衞，要表達嘅意念過於抽象，應該更赤裸裸咁講解。瑞典國民真係開放，睇嚟要真人表演先至夠喉！
荷里活有個星級化妝師最近去驗身，竟發現身上有大量重金屬，於是調查佢嘅生活習慣，見佢飲食一切正常，醫生正百思不得其解，最後一問佢做乜嘢？至知可能因為長期吸入或接觸化妝品有關，家陣呢位化妝師有失憶同埋甩頭髮嘅迹象，醫生話嚴重嘅仲會失去生育能力，但囡囡們唔使咁驚，因為日常化妝受感染嘅機會好微，但呢位化妝師日日夜夜都替人化妝，而且長期坐喺化妝間，所以至提高發病機會，但如果可以，閒時素顏一下都唔係壞事！
撰文：小德