對於裸體愛好者嚟講，法國、西班牙、加勒比海等嘅海灘已經係耳熟能詳嘅勝地，而最新冒起又畀到佢哋新鮮感嘅，就係位於巴西嘅海濱城市阿萊格里港。點解佢會成為全球裸體愛好者嘅最新夢想熱點呢？原來據當地新聞報道指，喺一個月內已經至少發生3宗民眾裸體行街嘅事件，當中仲包括著名巴西MMA女格鬥家Betina Baino。話說佢當時邊裸跑邊接受媒體採訪，喺被警察攔落嚟時，佢仲抗辯稱自己唔係裸體，而係回歸大自然而已。事實上，呢個地方之所以成為裸體者到此一露嘅熱點，由於當地有一個新興示威習慣，就係抗議者會喺示威過程中剝光豬，令當地人對裸體行為已經見怪不怪。不過提醒大家，就係裸體喺當地始終係違法呀！