大家出街見到有人打扮到成個公主、女僕咁款唔使奇怪，因為日本好多女仔都係咁着；至於日後如果見到有人由頭到腳笠住件膠衫，十足歐美SM四仔碟入面班男女演員咁，一樣唔使驚慌，因為佢哋好可能係學英國一位膠衫男咁做善事。早前科爾切斯特街頭出現一位全身着住黑色膠衫只係露出眼同口嘅神秘男子，不過呢位膠衫男對人冇惡意，仲相當友善，原來佢係為慈善而咁做！只要有人同佢合照，再將照片放上面書，膠衫男就會捐出1英鎊到當地嘅慈善團體「Colchester Mind」，至今佢已經捐出375英鎊，其面書已超過2,000幾個Like添！至於點解佢要咁做，呢位被人稱為「Gimp Man 」嘅膠衫男就表示着呢種膠衫係個人興趣，當第一次畀朋友見到佢咁着之後，對方就建議佢着膠衫去做善事，於是佢就坐言起行喇！