晚上一陣秋風吹來，真係令人爽到震！但原來秋天都可以予人熱辣辣嘅感覺，皆因由日本AV廠舉辦嘅初秋活動，有一班熱力逼人、魅力爆燈嘅星級女優放蕩登場，睇到人慶合合呀！
AV廠ORGA為咗慶祝成立1周年，早前特別舉辦大型活動「初秋之夜之妖艷會」，請來一班星級熟女以及青春女優齊齊慶賀。未講活動有乜嘢搞之前，先介紹一下ORGA呢間AV廠，佢嘅作風係以電視劇拍攝手法將AV呈現，劇情流暢又細膩，主演嘅女優多數都係有韻味又有演技嘅囡囡，令作品更具欣賞性。由於ORGA嘅作品精彩又好睇，所以銷售成績理想。而今次慶祝活動實行與眾同樂，早兩個月就公開賣飛畀AV迷入場參與。
話明係妖艷會，出席嘅女優好多都係妖艷嘅星級尤物，12位登場女優當中包括有熟女天后北条麻妃、SM天后川上由、潮吹天后大槻響以及現役當紅嘅美少女天后上原亞衣，有咁多重量級女優坐鎮，唔怪得入場券每張售9,000日圓（約650港元）都大把人搶飛啦！除此之外，仲有兩位小天后撐場，佢哋就係小島麻奈美以及紗倉真菜喇！二女以女子組合「乙女Frappuccino」身份喺台上載歌載舞，令現場增添唔少生氣。之後，輪到12位女優以美艷晚裝登場，而轉個頭佢哋就換上三點式泳衣以及內衣行Catwalk，大槻響同上原亞衣就青春嫩口，伊織涼子同橫山美玲則豐滿成熟，至於天后北条麻妃就勝在魅力驚人，雙眼電力十足，一時之間搞到現場觀眾血氣上湧！另外，大會設有攤位售賣ORGA嘅作品，買1隻碟可以同女優握手、攞簽名兼影相，買夠3隻碟仲可以參加攝影會同女優影個夠，ORGA真係識得搵錢！
撰文：賢