經典回魅:第一辣媽比佛莉德安姬羅

今時今日,年齡唔再係女人嘅秘密,因為高與低已唔多可以影響到女人展現美態,好多年過三、四十,甚至五十歲嘅女士一樣可以引死人。例如已係三女之母,年屆43嘅辣媽鍾麗緹好快就有火辣寫真集推出添。至於銀幕上經典嘅辣媽仲有比佛莉德安姬羅(Beverly D’s Angelo)。

阿公巴閉

從前嘅女藝人個個都守身如玉,有男友都唔敢認,但家陣就唔同喇,好多女星結婚生子之後照樣活躍於幕前,好似最近有新戲上演嘅荷里活女星謝茜嘉艾芭就係其中之一,呢位由辣妹變身辣媽嘅女星喺新戲當中更大跳誘人舞步,展現火辣身材添。不過,豪放嘅佢仲未夠經典女星比佛莉德安姬羅。德安姬羅生於1951年11月15日,喺美國俄州出世,其母係一名小提琴手,阿爸係意大利人,任職電視台經理。至於德嘅阿公就巴閉,佢係知名建築設計師Howard Dwight Smith,俄州知名嘅俄亥俄體育場就係出自其手筆。可能德亦遺傳到阿公嘅創作力,畢業後曾做過插畫師,之後擔任過歌手。由於德嘅歌藝水準唔差,曾經踏足百老匯舞台,後來更轉戰電視圈。

應露盡露

德安姬羅首次演出嘅電視劇集《Captains and the Kings》,當中表現出高水準演技,為其演藝之路打下良好基礎,一年之後更加跳到電影界發展。喺上世紀七十年代,德演過唔少電影,更憑住《Coal Miner's Daughter》贏得金球獎最佳女配角提名,雖然未能成功奪得獎項,但係亦顯示出佢嘅演技備受認同。演藝生涯當中,德經常以亮麗形象演出,佢迷人嘅雙眼、鮮明奪目嘅金色秀髮以及胸前嘅豪乳都深深吸引觀眾,難怪連殿堂級男演員阿爾柏仙奴都畀佢迷住。德安姬羅美麗又好身材,經常裸露演出,唔少仲係剝光豬登場,當中最激嘅就係《芳心謀殺案》,因為佢除咗全裸之外仲有激情床戲。即使年紀漸漸成熟,演出嘅係母親角色,卻依然唔停咁露。今年母親節,佢仲憑住《瘋狂假期》(Vacation)入面嘅一幕全裸出浴戲,當選為mrskin.com的十大電影辣媽第一位,足證其魅力非凡。

撰文:賢