印象中，肯性感裸露嘅模特兒，大多性格豪放，敢愛敢恨，但總有例外，不少性感美女意志薄弱，受少少打擊都喊得幾日，就好似今日要介紹嚟自四川嘅新進模特兒劉雪妮，就絕對係最佳例子。
祖籍四川宜賓嘅劉雪妮，自小就能歌善舞，問佢點解咁厲害？佢話全部都係喺電視上學番嚟，自己冇拜師，亦冇受過正統培訓。據講雪妮小小年紀，就曾參加電視台舉辦嘅歌唱比賽，而且一鳴驚人，但小時候雞仔聲示人，大個女仲係咁就好難發展，於是打定輸數，放棄演藝工作，所以大學時報讀咗四川航天職業技術學院，畢業後就喺航空公司嘅票務部工作。雪妮讀書時開始客串模特兒工作，所以攝影作品不斷，早就被網友發現佢嘅身影，出來工作後便一邊上班，一邊兼任模特兒。問佢打兩份工攰唔攰？佢笑笑口話唔攰，仲好好玩添！後生女即係後生女，活力過人，工作點忙都可以輕鬆應付。
雪妮有咁多時間打兩份工，明顯就冇愛情生活啦！原來雪妮單身咗都有一段時間，問佢點解唔識番個男朋友？佢若有所失咁話之前一個男朋友令佢傷得太重，所以暫時都唔想搞呢啲嘢。佢咁靚女仲單身，所以好多人都為佢擔心，最近捉咗佢上電視台嘅相親節目，佢嘅愛情宣言係「我愛的人已走了，愛我的人還未來！」果然係個相當感性嘅囡囡。但佢自我介紹時，話自己可以一星期不洗澡，但不能一星期不購物，而且仲話自己瞓覺時愛發夢話同打呼嚕，講到自己咁差，自然冇人敢揀佢；但佢好得意講，如果咁都有人揀佢，咁一定係真愛到臨。其實雪妮渴望愛情，但又怕受傷，真係好矛盾嘅靚女呀！
出生地：四川宜賓
三圍：32C-24-35
身高：162cm
簡介：劉雪妮嘅官方微博內有好多佢嘅自拍寫真，當中唔少大膽程度比收錢工作時仲要露骨。有天因為太熱竟一絲不掛，只按胸前兩點嚟自拍，係咪好出位呢？
網址：http://weibo.com/30150047
撰文：龍四海