家陣我哋將「女神」二字用得太濫太隨便，呢個又話女神，嗰個又話女神，查實對方只係靚少少，身材好少少而已，全冇半點女神神韻，你可能會話：「你咁叻，咁邊個至能夠叫做女神呀？」一代性感女神寶黛麗（Bo Derek）咪係囉！
每個人後生嘅時候都做過年少輕狂嘅事，例如逃學、未成年就入機舖打機等等，一代經典性感女神寶黛麗則更加瘋狂。1956年，寶黛麗出生於美國加州長灘，好細個佢父母就離異，後來佢做明星化妝嘅阿媽就改嫁咗一個電影特技人。
家庭狀況驟變，可能就令寶黛麗亦變得比較反叛，某一次佢去到知名清談節目《大衞牙擦騷》接受大衞利達文訪問嘅時候，就表示讀高中即係16歲嘅時候曾經逃學一個月，咁逃學去邊呢？原來係去咗海灘玩沖浪以及享受日光浴。寶黛麗阿媽知道梗係發晒火啦，而最後都係畀阿媽捉咗返學。之不過，寶黛麗好快就離開阿媽，因為佢邂逅咗一個畀佢大三十年嘅美國導演及演員約翰德里克（John Derek）。講起呢個約翰德里克又真係好識食，佢娶嘅老婆個個都係性感尤物，包括第一代邦女神烏蘇拉安德絲以及蓮達伊雲斯。而約翰德里克就為咗寶黛麗同蓮達伊雲斯離婚，然後雙雙去到德國生活咗兩年，到寶黛麗18歲至再返美國定居，以避免觸犯法例。
由於約翰德里克喺演藝界都有咁上下地位同人脈，所以幫助到年紀輕輕又未經演藝訓練嘅寶黛麗喺電影當中搵到演出機會，加上寶黛麗又的確生得嬌美迷人，身材健美又豐滿，令佢自演出第一部電影《Orca》之後，搵到更加機會表現身價。當中值得一提嘅就係浪漫喜劇《10》喇，寶黛麗以一件頭低V泳裝以出水芙蓉姿態出現，畫面甫現螢幕就令觀眾們為之驚艷，自此寶黛麗就被封為性感女神。早前英國一間網上時裝店選出歷來最性感嘅泳裝經典時刻，呢一幕就獲選為第三名，可見寶黛麗嘅魅力有幾強。
無獨有偶，寶黛麗隨後都有唔少性感演出大玩濕身誘惑，例如喺《人猿泰山》就出現一幕森林出浴戲。另外，喺《撒旦女媧》亦有濕身透點戲，此外，寶黛麗仲同男主角於電單車上激烈交歡，寶黛麗全裸演出之餘，交歡嘅時候更加做到拗晒腰，認真夠激夠狂野，正呀！
撰文：賢