巴西世界盃係國際足球盛事，大家應該齊齊熱烈支持，之不過巴西當地卻有唔少人唔多鍾意，更加趁世盃舉行期間上街遊行抗議，之但係用到暴力手法就唔應該，不如學吓巴西嘅一班妓女咁，發動街頭足球賽嚟表達維權心意好過啦！早前，巴西米納斯吉拉斯嘅一個妓女組織就舉行街頭足球賽，除咗有當地嘅妓女組隊參賽，仲邀請到來自巴西貝洛奧里藏特大學嘅女學生，以及一個宗教相關團體落場參賽。呢個街頭球賽嘅戰況亦相當激烈，一眾參與嘅妓女更展示出非凡球技，令人拍爛手掌。妓女組織嘅發言人表示，咁做其實係想話畀大家知足球係世界上人人都有權參與嘅運動，而妓女亦一樣有人權，地位唔應該被貶低。