澳門有處地方叫做桃花崗，老街坊一定認識，叫得桃花崗，好多朋友都以為佢與陶淵明所描述嘅桃花源一樣風光明媚，桃花遍地！但其實呢度冇桃花，亦冇山崗，而且桃花崗更唔係一個正式嘅地名。話說桃花崗位於羅約翰神父街與蓮莖圍對開嘅地段，附近最有名嘅就係建於1936年嘅紅街市大樓，從大樓旁嘅小橫巷，穿過去就係桃花崗，當你千辛萬苦嚟到，會見到一列小屋，裏面有餅店同咖啡檔等小店，坐喺度幫襯嘅都係大叔大嬸，你不禁會問桃花在哪裏？原來你早四、五十年前嚟，呢度真係一個賞花勝地，話說七十年代，澳門經濟轉型，喺附近罅些喇提督大馬路同埋慕拉士大馬路一帶興建咗好多工廠大廈，是當年澳門最早期嘅工廠區之一。由於工廠林立，所以聚集唔少工友，佢哋每到食晏時候，桃花崗就變為熟食中心，提供食物畀附近上班嘅工友們，而當時上班嘅十居其九都係女工，所以嚟食晏嘅亦都係清一色美女，桃花處處，由此一個平凡嘅熟食中心，就被人冠以桃花崗嘅稱號。