現今體壇好多女選手都實力與美貌兼備，好似網球界嘅舒拉寶娃及中國跳水選手何姿等，而日本嘅體壇美人一樣唔少，例如乒乓球天后四元奈生美咁就睇得又打得喇！
提到日本體壇，佢哋嘅美女運動員相當多，包括羽毛球美人潮田玲子、體操可愛美少女中村果生莉、沙排嘅淺尾美和等，後兩者唔單只於運動場上展現出強勁實力，殺入藝能界一樣盡展迷倒不少男觀眾嘅魅力。除咗佢哋之外，喺藝能界同體壇都同樣憑實力闖出一片天嘅仲有四元奈生美。奈生美今年35歲，但係面上冇皺紋之餘，氣質仲保持青春俏麗，感覺高雅又有貴氣，實在唔覺佢年過三十，兼且已結婚產子。無錯，2011年4月奈生美同男子沙排選手井上真彌結婚，同年11月就生咗個囝囝，好明顯就係奉依然子成婚。不過點都好，奈生美即使已生過BB，體態依然咁苗條，身上冇多餘肥肉之外仲肉地結實，身材夠吸引之外仲多帶一份健康感覺。
奈生美佢4歲就開始學打乒乓球，到入讀淑德短期大學呢段期間，已以業餘選手身份挑戰過國內不少乒乓球大賽，並獲獎無數，而就讀大學之後，奈生美仲轉埋做職業選手。2004年奈生美更加盟中國北京乒乓球俱樂部隊，勇闖中國乒乓球超級聯賽，成為該賽事嘅第二位日本過江龍，實力非同凡響。之不過，奈生美為人津津樂道嘅唔單只佢嘅球技，仲有美貌以及出賽時嘅服飾，因為佢話一般嘅乒乓球球衣太單調太老土，佢想打破呢種傳統。奈生美最令人印象深刻嘅就係經常戴上菊花頭飾，及着上色彩鮮艷兼且有珠片嘅靚衫出賽。生完BB後，奈生美有一段時間處於休息狀態，不過上年就宣告復出乒乓球壇，另一方面亦獲藝能界向佢招手，現正主持網上電視節目《充分使用四元奈純粹美 有機蔬菜的日餐店的午餐》。
四元奈生美結婚之後除咗工作就係歸家相夫教子，想分享佢嘅家庭樂大可以Click上佢個博客。
網址：http://ameblo.jp/naomi-yotsumoto/
年齡：35歲
身高：4呎11吋
三圍：33-23-33
撰文：賢