美式桌球喺香港唔算流行，但喺附近嘅韓國、日本同台灣就十分多人玩，佢哋仲培訓出不少美艷性感嘅職業女球手，令喜歡桌球嘅朋友大增。而喺澳門有得打美式桌球嘅地方唔係咁多，幾間大型夜總會，就會喺貴賓房內放張美式桌球枱，主要要嚟招呼內地朋友，話說佢哋好喜歡打美式桌球，貪佢冇咁多規矩，而且張波枱細啲，行幾步就到，最重要係枱細球洞大，入球嘅機會大好多，一場比賽嘅時間唔多，同朋友打場牙骹賽，快上快落，特別啱喺夜總會玩嘅時候，幾分鐘一鋪，打完又可以返埋位攬女。至於夜場有冇女球手駐場專同客人交手呢？話說係有嘅，佢哋最叻嘅地方並唔係一鋪清袋，而係校靚「餐士」等客人QQ入袋，客人高興自然有醒，一盤波一兩百蚊唔少得，呢位囡囡單係賺打波小費都不得了呀！