所謂人無完人，金無赤足，好多人有優點亦有缺點，好似不少女明星咁，有美貌有身材，但係唱歌好似劏豬咁，演戲連對白都講唔清楚兼冇表情。之不過，有外在美又有演技，仲敢於裸露嘅性感女神喺世界情色電影史上亦有唔少，小弟最鍾意嘅荷里活女星金碧辛嘉（Kim Basinger）就絕對係其中之一。
小弟我細細個就好鍾意睇美國超級英雄電影，記憶最深刻嘅就係1989年嘅《蝙蝠俠》，除咗因為正邪兩個男主角個性夠晒突出，蝙蝠俠又多法寶，吸引我嘅仲有當時令我驚為天人嘅女主角金碧辛嘉！於戲中，金碧辛嘉留住一頭耀眼嘅金色長髮，氣質清雅綺麗，真係迷死人！後來到我大個仔翻查資料，至發覺呢位女神原來拍過裸照，家陣先介紹一下佢嘅背景。擁有德國同瑞典血統嘅金碧辛嘉，1953年於美國喬治亞州出生，其父係一名樂手，母親係模特兒兼演員。可能因為父親經常唔喺屋企，阿媽又成日唔得閒，所以金碧辛嘉喺一次訪問中表示小時候經常感到害羞同孤獨，仲話阿爸從未有一句讚美說話，令佢自小缺乏自信。幸好，到長大加入學校嘅啦啦隊之後，金碧辛嘉終於挽回自信，敢於表現自我，後來仲踏上模特兒之路。
金碧辛嘉氣質非凡又好身材，做模特兒相當吃香，好快成為天橋界嘅天之驕女，後來仲贏得喬治亞州小姐競選。之不過，金碧辛嘉並未停步，仲敢脫敢露，並為知名成人雜誌拍裸照，展露誘人身段。由於金碧辛嘉嘅美貌以及名氣吸引到電影界注意，1981年獲邀演出其首部電影作品《Hard Country》，兩年後更被挑選為邦女郎，同辛康納利合作演出《鐵金剛勇奪巡航導彈》。金碧辛嘉喺大銀幕上絕對唔係花瓶，其演技有相當高水準，1996年佢就憑演出《幕後嫌疑犯》而贏得奧斯卡最佳女配角及金球獎最佳電影女配角喇。金碧辛嘉拍過唔少裸露演出嘅電影，最經典嘅就係《九個半星期》啦。當中扮演一個任由男主角米奇洛基玩弄嘅柔情女仔，二人連番纏綿，金碧辛嘉於過程當中露全相，各種調情方法，例如洛基用冰粒漫遊金碧辛嘉全身，又或者蒙眼交歡等，場面浪漫又意淫，實在要好好收藏多番研究。
撰文：賢