國際影壇有好多女星都係由童星做起，唔少仲會隨住年紀增長而演出嘅開放程度亦隨之上升，好似日本嘅安達祐實早前就拍咗本露毛嘅寫真，而荷里活嘅史嘉娜祖漢遜好快就有部全裸電影推出。除咗佢哋之外，由童星變成肉彈嘅仲有經典女星蓮達貝理雅（Linda Blair）。
如果大家唔善忘，應該記得冇幾耐之前，小弟為大家介紹過珍美李寇蒂絲呢位身材火辣嘅美艷女星。珍美李年輕嘅時候憑住《月光光心慌慌》而成名，更加被稱為「尖叫女王」。其實，除咗佢之外，仲有一位經典嘅性感女星憑着演出一齣家喻戶曉嘅大師級經典恐怖片成名，然後再加入脫星行列，呢位就係蓮達貝理雅喇。蓮達1959年出生於美國密蘇里州嘅聖路易斯，然後舉家遷移到美國西港市。6歲嘅時候，蓮達已踏足演藝圈，為肥皂劇《Hidden Faces》演出。雖然年紀咁細，但係相當乖巧而且演技水平唔低，故此好快就被邀請拍戲，其首部電影作品就係1971年上映嘅《The Sporting Club》。兩年後，蓮達更加一炮而紅，所憑嘅作品就係恐怖片中嘅經典之作《驅魔人》！蓮達於片中飾演被惡魔附身嘅女孩子，佢充滿邪氣、藐視眾生嘅演技認真精湛，作品之所以被封為經典，其功勞不淺。
《驅魔人》除咗成為恐怖片中嘅不朽之作，仲為蓮達贏得金球獎最佳女配角獎項，後來佢再拍《驅魔人2》亦獲競逐美國木星獎最佳女主角提名。到八十年代，蓮達由小女孩變身為身材豐滿嘅肉彈型美女，而佢嘅戲路亦出現重大轉變，原因係基於冇乜人搵佢拍戲，惟有接拍低成本嘅槍戰片，例如《Chained Heat》以及《Red Heat》等等。而呢段時間嘅作品，蓮達並冇浪費自己嘅驕人身材，於片中大露巨型導彈，喺《Chained Heat》當中更加有一幕同經典脫星西碧爾丹寧互相上下其手嘅誘人演出。另外，同一時期，蓮達亦有為國際知名P字頭成人雜誌拍裸露寫真，可以話完完全全蛻變為脫星。近年，蓮達鮮有作品推出，因為佢已經變成一個素食主義以及保護動物主義者，並成立蓮達貝理雅世界之心基金會，幫助收養以及救助動物。
撰文：賢