鹹趣濠江:最後也風光

講起清平戲院嘅威水史,啲老街坊話真係數之不盡,除咗救番福隆新街一帶嘅新填海區,由無人問津嘅鬼域變為繁榮娼盛嘅不夜城,已經夠晒傳奇,之後名伶老倌接踵而至,將廣東大戲由戲棚走入劇院演出,絕對可以記一功,而同時每有大事發生,籌款義演、動員救災等活動,清平戲院都出過吓力,最為人記得就係1911年,孫中山先生見革命快將成功,於是呼籲澳門同胞一齊喺清平戲院舉行剪辮大會,迎接民國成立,亦成為一時佳話。

講開劇團演出,京劇泰斗梅蘭芳先生,原來喺1956年跟隨住「中國藝術團」嚟過清平戲院演出,轟動一時,直至六、七十年代新劇院陸續出現,清平戲院才淡出戲曲舞台,主力放映電影,直至1992年結業前,更淪為三級片戲院,十零廿蚊睇足全日,戲院結業後成為貨倉車場,但2012年又畀佢威一次,就係吸引到著名韓國女星全智賢嚟拍《盜賊門》,令佢喺改建前再風光一次!

撰文:小德