要數去年冒起最快嘅新進模特兒，今日介紹嘅顧欣怡絕對係其中一位，兩年前喺模特兒界佢仲係不見經傳，但經過一番努力，已經躍升為人氣名模，更被潮流界同廣告界，喻為本年度嘅新寵兒！
今年先至22歲嘅顧欣怡，大約兩年前出道，佢冇讀過乜嘢表演專科，所以絕對係半途出家，但欣怡勝在肯學肯問，每次拍攝時都喜歡同攝影師研究，交流心得，日子有功，就學懂如何擺甫士令自己更美更性感。而欣怡本身條件真係唔差，170cm嘅身高，手長腳長，單係雙修長美腿就已經令人為佢瘋狂。加上完美嘅火辣三圍，就算唔識擺甫士都夠晒攞命，更何況欣怡拍攝性感照時，真係一啲都唔錫身，寫真嘅噴血程度高達危險程度。雖然得天獨厚，但欣怡冇自負，反而不斷努力，不斷挑戰自己，參加無數選美比賽，最終憑其實力，獲獎無數，因而令佢喺圈內人氣日盛。
於是各大雜誌同廣告商都向欣怡招手，單係過去短短一年，就接拍咗多間著名時尚雜誌同高級商品嘅廣告，而且更去過日本同韓國接拍廣告，據講欣怡為咗工作，更苦練韓文，去到現場唔使翻譯都可以跟廣告商同攝影師溝通，做出佢哋要求嘅完美效果。大家咪以為欣怡只顧模特兒工作，喺咁忙嘅情況下，佢仲出席唔少內地嘅綜藝節目，所以欣怡嘅形象更殺埋入屋，唔少師奶大嬸都對佢有印象。以為佢夠晒忙，點知佢仲先後參演咗三套電影嘅演出，令佢除咗係當紅模特兒外，更係演藝界嘅新星，佢忙成咁肯定豬籠入水，但佢話唔想咁忙，因為忙到冇覺好瞓，會影響皮膚喎！
簡介：雖然網上有好多顧欣怡嘅照片網頁，但收集得最多最齊，一定係佢自己嘅微博莫屬，無論寫真、自拍定工作花絮都有齊喺入面。
網址：http://s.weibo.com/weibo/%E9%A1%BE%E6%AC%A3%E6%80%A1
出生地：重慶
三圍：34.5-24-35
身高：170cm
撰文：龍四海