澳門嘅清平戲院自1992年8月結業以嚟一直空置，以為難逃清拆嘅命運，但近日有組織決定將戲院活化，成為粵劇文化陳列館，傳承廣東戲曲文化，改建後有啲似香港油麻地戲院咁樣，對於戲曲迷無疑係一個天大嘅好消息。講番清平戲院同粵劇界嘅關係，可謂非常密切，自佢開張嗰日開始就密不可分，1875年開張時剛巧遇上發展商八秩開一嘅大壽，請咗當年廣州粵劇班霸「永豐年」嚟做戲，首演劇目叫做《香花山賀壽》，自此各地有名嘅戲班都嚟演出，一班接一班，啲期排到密一密，熱鬧過家陣嘅紅磡體育館，而大家最為熟悉嘅任劍輝任姐，就喺清平戲院長駐演出過一段日子，話說1935年任姐由廣州嚟到澳門演出，點知因為戰亂嘅關係，一做就做咗十年，佢小妹任冰兒話佢自小就喺清平戲院長大。而當年任姐自組新班名為「新聲劇團」，由佢做文武生，而正印花旦就係陳艷儂，咁白雪仙呢？原來兩人都係喺澳門結緣，當年仙姐做二幫花旦，一直到戰後，兩人至嚟香港發展，奠定日後傳奇故事。