最近天氣一時熱、一時凍，感覺有少少初起感冒嘅徵狀，周身都唔舒服。於是見過開嚟澳門，就貢咗上大富豪桑拿諗住焗身汗出嚟，經過一輪乾焗濕蒸之後，身體真係好番好多，第一時間仲感覺到肚餓添，於是走埋廚房睇吓有乜嘢好介紹，大廚知道我身體抱恙，所以勸我食清淡少少，於是就特別炮製咗「蝦米雜菜煲」畀我試吓，等咗十分鐘左右，大大煲熱辣辣嘅雜菜煲就出現眼前，服務員把蓋子一打開，先湧出生曬蝦乾嘅濃香味，跟着陣陣雜菜嘅鮮香味，再定神一聞，發現香味中仲有少少雞湯香味，原來大廚用咗清雞湯做湯底，所以香味特別豐富，而且各具特色，首先我就飲啖湯，果然鮮味十足，但筷子再往底層一夾，發現底部有唔少晶瑩通透嘅上等粉絲，粉絲吸收晒上湯嘅精華，咬落味道一流，配埋不同雜菜嚟食，令人感覺舒服同實在，食晒成煲啱啱好，而且一啲油膩感都冇，大廚真係冇介紹錯！