新加坡旅遊局最近出咗條專為菲律賓旅客而拍攝嘅宣傳片，由於內容老土，所以放上網冇幾耐就被迫下架。該宣傳片故事講述一對各有各忙嘅夫妻，為慶祝結婚1周年，於是忙裏偷閒去新加坡度假，兩人仲去咗好多名勝參觀同新地標吃喝玩樂，最後返到酒店，妻子送咗一份禮物畀丈夫，丈夫打開後發現原來係一支顯示有孕嘅驗孕棒，丈夫大喜，十分感慨咁話：「我早就知道新加坡總有驚喜等住我！」唔少網友狠批係最爛嘅廣告，宣傳唔到真正嘅新加坡；另有網友話故事不但老土，仲好大殺風景，皆因嗰兩夫妻難得去度假溫馨一下，點知老婆就送支驗孕棒畀老公，即係代表乜都唔使搞啦！更有口痕網友話既然呢兩夫妻都咁忙，邊有時間做愛，此子何來，真係要問句妻？都話網友嘅想像力最豐富o架啦！