澳吧吧：濠江醉高點

澳門嘅夜景迷人，只係講到最飽覽濠江夜景嘅酒吧，就非位於澳門旅遊塔59樓嘅180。空中酒吧莫屬！作為澳門地標高塔，佢可以180度兼且喺超過300米高空盡覽澳門嘅夜色。大家既可以坐喺向窗位置，獨享私人夜色，又有臨窗4人餐枱共進晚餐。除咗有得天獨厚嘅高空優勢外，酒吧嘅環境亦值得一讚，以醉人燭光配合音樂，為酒客提供一個絕妙嘅場所。當然，對酒客嚟講酒類必不可少，酒吧提供多種酒類，從啤酒、白酒、紅酒，以至雞尾酒等一應俱全。個人推介黃昏時候去最好，皆因可以邊睇日落美景邊品嘗美酒，咁靚嘅景觀唔係周圍都有。