位於上環港澳碼頭附近嘅大笪地，每日華燈初上，各式商販湧現，有賣雜貨、有賣膏藥，更有不少美食攤檔，相信係唔少港人嘅集體回憶。但原來澳門嘅大笪地，歷史更悠久，於上世紀初就已經出現，話說當年喺內港附近進行大型填海，把整個白眼塘填平，新區內建造不少新房子，而臨海地區有大片空地原本要嚟發展，但有相士叮囑地主，不宜在這區動土，於是地主沒有建房，反而任由商販擺賣，漸漸成行成市，但葡國人怕人多眾集會生事，於是要地主好好管理，建一座「小販檔集中亭」，簡稱市亭，每逢入夜，整個海邊都會燈火通明，各種雜貨、小食、表演攤販，一應俱備，熱鬧非常，據講一直至天光仍客流不斷，亦由於生意太過火旺，所以地主抽嘅攤稅，一次比一次貴，最後由於稅收太重，商販無奈陸續撤走，後嚟澳門政府喺蓬萊新巷設新市巷，希望商販繼續經營，但熱情度已經不再，白眼塘區嘅夜市大笪地，最後亦只得劃上句號。