各位巴打夜蒲之後出嚟消夜，經常都會點到雞軟骨呢款菜，而做法就係採用油炸，之後再加椒鹽，就成為椒鹽雞軟骨，要嚟佐酒，絕對係最佳消夜菜式。
再唔係高級啲嘅，就係去日本食肆食炭燒雞軟骨，燒到皮脆肉嫩，食落口油香四溢，回味無窮，兩種食法都能食到雞軟骨嘅味道同特色。但前兩日到澳門大富豪桑拿，大廚特別用雞軟骨設計咗一款新菜式，令我十分驚喜，就係「川辣雞軟骨」。
大廚將雞軟骨用秘製醬汁醃咗成晚，之後用豬油走油，晾乾後備用，之後就用四川香料爆鑊，把配菜放入快炒，最後再將雞軟骨落鑊埋芡，外層又脆又香，食落陣陣麻辣感覺，完全佔據住你嘅口腔。
由於雞軟骨用秘製醬汁醃過加上豬油走油，所以肉香特濃，好食到不得了，略嫌真係有啲辣，相信喜歡食辣嘅朋友定會飽餐一頓！
食品提供：大富豪桑拿
價錢：桑拿客人$25
撰文：小德
