經典回魅:無可取代 施維亞姬絲桃

一個演員點至算係成功呢?從觀眾對其稱呼可見。例如見到專門反串扮醜女嘅李健仁,大家一定會叫佢做「如花」,因為佢演呢類角色實在太深入民心。是以,大家見到本文標題,未必會知道呢個女演員係邊位,但係一講到呢套電影,影迷自然會記得兼且回味,佢咪係艾曼妞囉!

電視小姐

施維亞姬絲桃(Sylvia Kristel)1952年於荷蘭出生,佢天生聰慧,據聞智商高達167,仲精通五國語言,認真叻女。之不過,姬絲桃佢細細個已經性格反叛,未成年就已經食煙同飲酒。17歲嘅時候被人睇中搵佢做模特兒,憑其清麗脫俗嘅美貌以及纖巧又婀娜嘅胴體爭取到唔少人氣,並幫助佢於1973年歐洲電視小姐競選成功奪冠。挾住呢個冠軍名銜,姬絲桃就開始進軍影視圈。喺三部荷蘭電影中擔任配角之後,見到知名製片人亞倫史歷斯基招募女演員,於是前往面試。亞倫史歷斯基憶述當時嘅情況,話姬絲桃面試嘅時候,一邊讀台詞,一邊衣服突然滑落露出胸部,卻神態自若,慢慢整理好衣衫,其表現即刻令佢覺得搵啱人!後來,姬絲桃就表示,自己係睇完個劇本特登咁做以配合角色,真係唔讚佢醒目都唔得!

高傲冷艷

至於兩人合作嘅電影,相信大家就算未睇過都應該聽過,因為此作實在太出名、太經典。冇錯!正是《艾曼妞》!1974法國軟性色情經典《艾曼妞》面世,電影改編自一本1957年出版嘅小說《艾曼妞夫人》,故事講述法國外交官嘅妻子艾曼紐係一位生活乏味嘅家庭主婦,為咗滿足好奇心以及性需要,於是展開性愛索探,見識好多光怪陸離嘅性愛體驗,而姬絲桃就係飾演呢個艾曼妞喇。姬絲桃氣質非凡,一派高傲冷艷,但係又對男人充滿渴求嘅表現真係演得絲絲入扣,加上佢對裸露演出駕輕就熟,令《艾曼妞》一片充滿誘惑,簡直迷倒萬千影迷,應該講係億萬男士最貼切,因為荷蘭媒體曾指出全球曾有3億5,000萬觀眾睇過《艾曼妞》。姬絲桃憑此片一炮而紅,隨後斷斷續續演出多部《艾曼妞》續集,另外一部《查泰萊夫人的情人》同樣都係情色電影經典,可謂成就非凡,惠澤幾代男兒。只可惜,2012年姬絲桃因癌症病逝,令影迷永遠懷念呢位「永遠的艾曼妞」。

撰文:賢