「Thanks, Thanks, Thanks, Thanks, Monica」，呢句係張國榮《Monica》一曲嘅歌詞，雖然已經有番咁上下歷史，但係家陣聽起上嚟依然令人回味。如果大家認識意大利呢位國寶級性感尤物蒙妮卡貝露慈（Monica Bellucci），再聽埋呢首歌就更加有Feel，因為無論其美貌、胴體以及演出每每令人印象深刻，敢問一句「 誰能代替你地位」！
今年49歲嘅蒙妮卡貝露慈，出生於意大利卡斯泰洛城，係意國嘅國寶級女演員兼模特兒。蒙妮卡父親經營卡車公司，而母親就係一個藝術家。蒙妮卡佢16歲嘅時候就已發育得相當良好，所以被模特兒公司睇中，搵佢做模特兒。當時，佢都係諗住半工讀，並且以律師作為工作目標。蒙妮卡入讀大學主修法律期間，一路都有做業餘模特兒，到佢畢業嘅時候，可能太過憧憬成為知名模特兒，於是就決定去米蘭工作。蒙妮卡佢身高5呎7吋，三圍35-24-35，葫蘆樽一樣嘅身形加埋冷艷又高貴嘅氣質，簡直係人間極品，亦令佢喺模特兒界發展如意，更有意大利國寶級模特兒嘅稱號。
喺模特兒界闖出名堂嘅蒙妮卡，於1990年開始踏足電視圈，頭一次演出就係電視劇《孩子們的生命》，之後佢仲相繼為多部意大利電影演出。之不過，意大利電影當時喺國際間甚至國內都處於不景氣狀態，蒙妮卡縱使出盡渾身解數都未能成功，於是輾轉去到法國發展演藝事業。其出色又賣力嘅演出果然得到別人賞識，仲搵到機會去荷里活發展，2000年第一部作品就係電影《懸疑對戰》。同年，蒙妮卡喺《西西里的美麗傳說》擔正做女主角，扮演一個老公去咗打仗，獨力求存嘅美麗人妻。其迷人嘅風采以及出色嘅演繹固然令人驚艷，敢於裸露豪乳更令佢深深吸引男士們目光，幫助蒙妮卡人氣急升，往後贏得參演唔少荷里活電影機會，如《廿二世紀殺人網絡》第二、三集等等。人紅咗，蒙妮卡並冇因此而錫身，拍攝《無可挽回》嘅時候，佢喺一場長達9分鐘嘅強暴、虐打戲當中，畀人搞到花容失色，專業態度以及搏命程度值得致敬。不過我就唔推介呢部咁殘忍嘅電影，而係佢主演嘅《偷情愛美神》，當中佢扮演高級妓女，利用其美色與胴體迷倒眾生，一幕又一幕嘅床戲展露出其誘人身段以及迷人神采，實在太誘惑喇！
撰文：賢