巴打些牙:內衣購物活動

「半裸優惠活動」又嚟啦!今次輪到意大利嘅都靈,話說當地有間名牌服裝公司搞個冬天促銷活動,早前就透過短訊同網絡宣布,喺指定日子着內衣褲嚟購物嘅頭100位顧客,可以免費攞兩件衫走,條橋雖然唔係新,但呢間意大利時裝公司啲衫最平都成千蚊件,所以除咗吸引當地人外,仲吸引唔少遊客嚟搶埋一份。活動當日天未光就有幾百人喺時裝店門口排隊,佢哋好守規矩之餘,仲個個年輕貌美,女士們只着內衣示人,身材表露無遺,吸引唔少記者同龍友瘋狂影相。有內地網友指如果佢喺現場,唔買嘢都走入去逼吓,單係睇啲女搶衫褲,就已經值回票價喎!

撰文:小德