巴打些牙:打沙包減壓

年近歲晚,內地春運潮正式展開,據知單係北京鐵路局嘅客戶服務中心,每日就收到3萬幾個查詢電話,故當局已安排100名職員24小時服務。計一計,每個職員每日要接聽幾百個電話,壓力真係大到不得了,有見及此,該部門嘅主管喺休息室擺放咗一個大沙包同宣洩板,等員工休息時,可以出力咁打沙包,或者寫啲字貼喺板上發洩一下。有網友問呢班鐵路熱線職員真係有咁大壓力咩?唔講真係唔知,原來啲人打嚟鬧人多過查詢,例如火車出現延誤,客人就會打嚟投訴,有啲仲會一輪嘴鬧個不停,之但係佢哋又唔可以駁嘴,所以真係好大壓力。員工受埋咁多氣,唔發洩一下點又得,見到女員工打沙包打到拳拳到肉,證明佢真係受咗唔少怨屈呀陰功!

撰文:小德