經典回魅：走光女神 莎朗史東

天生麗質

好多知名荷里活女星都有拍攝三級片嘅經歷，好似荷爾芭莉、安祖蓮娜祖莉等都試過作露點演出。一兩部露點作之後就好少繼續豪放落去，實在浪費咗一副大好身材。不過，莎朗史東就唔同，因為冇性感演出就唔算係佢嘅作品。莎朗史東出生於美國賓夕凡尼亞州嘅富裕家庭，阿爸係工具和模具製造商，阿媽就從事會計工作。莎朗讀書成績甚佳，擁有154智商嘅佢，15歲就考入賓夕凡尼亞大學。之不過，17歲嘅時候就因為知道自己天生麗質係最大優勢，於是就參加賓夕凡尼亞州克勞福德縣小姐選舉，並憑一副好身材以及嬌美面孔而成功奪冠。後來，莎朗就轉做時裝模特兒，1980年就開始踏足娛樂圈，拍攝電影《星塵往事》。

一露彈起

往後幾年，莎朗喺電影圈有唔少演出機會，但係發揮機會極少，好多作品幾乎都冇佢份講對白添。到1990年，莎朗演出阿諾舒華辛力加嘅《宇宙威龍》，由於戲份唔少加上有火辣演出而令人留下印象，加上當年佢又為《花花公子》嚟個全裸演出，人氣漸漸上升。之後，莎朗終於有一部代表作，此作更成為荷里活電影當中嘅經典，呢部就係《本能》喇！莎朗喺片中飾演背負殺人嫌疑嘅女作家，同經典男星米高德格拉斯鬥戲。而莎朗於片中三點盡露，除咗同米高於床上激戰連場，一幕喺警局被盤問時特登翹腿走光嘅場面更令人睇到熱血沸騰，成為電影經典一幕，為莎朗奠定性感女郎地位。而佢成名之後，喺《炮彈專家》、《偷窺》等電影都有火辣演出，到2006年莎朗接拍《本能2》再次露點演出，之不過因為已經年華老去，加埋劇本不濟，搞到臨尾香。

撰文：賢