朴詩賢是南韓車模，各大大小小嘅車展都見到佢嘅身影之外，仲代言多個人氣品牌，所以佢嘅照片，喺南韓隨處可見，佢嘅粉絲與日俱增，要數當地今年最具人氣嘅車模，佢一定係其中之一。
今年29歲嘅朴詩賢，同好多南韓車模一樣，最先都係跑賽車場做賽車女郎，話說佢廿歲時候就出道，起先係做吓兼職或者替班車模，直至2005年，有車隊簽詩賢做全職車模，當時才21歲，自此多年嚟都喺車場打滾，此外更開始做埋車廠代言。期間有記者問佢喜唔喜歡與車為伍，佢好直接咁話比較喜歡與電腦遊戲一齊，唔講唔知，原來詩賢唔開工就匿埋屋企打機，係名副其實嘅宅女，此消息一傳開，自然引起網絡遊戲商嘅注意，幾年前開始更做埋遊戲代言，令佢人氣大大提升！
好多人都話詩賢好豪邁狂野，但原來佢嘅性格非常文靜，只係大家畀詩賢嘅外表呃咗。身材高挑嘅詩賢，三圍唔算好大，但出嚟嘅效果就玲瓏浮凸，有前有後，加上皮膚顏色比較黑，唔似一般韓妹咁白，所以一望埋去，好有歐陸風味，加上詩賢冷酷時不怒而威，有好強嘅壓台感，所以近年唔少時裝雜誌都搵佢做模特兒，憑多年經驗，對詩賢嚟講可以話完全冇難度，家陣除咗喺模特兒界炙手可熱之外，近年仲染指埋電視箱，但主要係出席綜藝節目，每次表現都十分出色，深得觀眾們嘅歡迎，唔知幾時拍埋韓劇，咁就有更多人認識，隨時紅到去外國呀！
簡介：呢個網頁收藏咗朴詩賢數百張精美寫真，當中性感照佔六成以上，噴血度極高，其餘都係賽車女郎同埋秀場造型照，雖然密實啲，但一樣吸引！
網址：http://myfavorites.jonai.net/Korean/Park_Si-Hyun/index.html
出生地：南韓
三圍：35-24-35
身高：170cm
撰文：龍四海