要數南韓十大美女車模，徐有珍絕對係其中一個，有珍出道近十年，時至今日，媒體會用「始終如一」嚟形容佢，除咗話佢樣子冇變過之外，佢嘅工作同事業，亦係始終如一，冇話想過界染指去其他媒體！
1984年11月5日出生嘅徐有珍，今年29歲，入行快將十年，雖然近年新人不斷湧現，但有珍喺模特兒界，仍然人氣高企，炙手可熱，工作量更係不斷，無論車展或者雜誌，大家都可以見到佢嘅身影。除咗十年嚟仍屹立不倒之外，以有珍嘅人氣，大可染指其他媒體，例如拍吓電視或者唱吓歌咁，但有珍多年來都冇咁做，只專心做好模特兒嘅工作，有人問佢係咪冇膽接受新挑戰，有珍話唔係，只覺得仲未係時候，所以都係做好目前嘅工作，向客人同粉絲好好交代就夠啦！又係噃，家陣做模特兒已經豬籠入水，冇理由再自找麻煩啫！
除咗工作不變，有珍仲有一樣嘢冇變過，就係佢嘅樣貌，大家如果有機會睇番佢初出道時嘅舊相同今日嘅一比，真係分毫無差，十年冇變，有珍清秀可愛嘅造型，到今時今日仍然擁有，只係稍稍多咗份穩重感。至於身形方面亦都一樣，初出度時高挑纖薄嘅身形，到依家仍然保持得一模一樣。有當地傳媒講，有珍唯一變咗嘅就係佢嘅性格，家陣嘅有珍冇以前咁活潑調皮，可以話定性咗好多，而且識做人好多，見到媒體記者會主動打招呼，有時更會閒談幾句講講近況，可以話認真識做，所以有珍多年嚟喺事業上能夠屹立不倒，係有佢成功嘅原因！
簡介：徐有珍出道多年，一直都紅透半邊天，所以佢嘅寫真真係多到不得了，但自己冇官網保存，只靠粉絲珍藏，以下就係收藏得最多嘅網頁。
網址：http://myfavorites.jonai.net/Korean/Seo_You-Jin/index.html
出生地：南韓
三圍：34-24-34
身高：170cm
撰文：龍四海