師傅教落做男人唔靚仔唔緊要，冇錢亦唔緊要。咁乜嘢最重要呀？就係口技要了得，夠晒油腔滑調，說話講到天花龍鳳，咁樣氹女仔都容易好多。其實做女仔一樣要好口技，我係指說話技巧咋！好似甲斐麻理惠咁，講說話叻，玩樂器又叻，咁咪有前途囉！
年方十八，青春活潑嘅美少女固然吸引，但係小弟我就唔覺得佢係我杯茶，因為一直以來小弟都認為女性應該有女人味至係最索，而呢股女人味一定需要時日去慢慢醞釀出嚟，故此年過三十歲嘅女性就最合我合尺喇！如果閣下都係咁諗，不妨將我最鍾意嘅其中一員日本女藝人甲斐麻理惠介紹畀你認識。麻理惠今年33歲，皮光肉滑，感覺仲係好嫩口。麻理惠氣質天然綺麗之外，面上嘅女人味配上知性美顯示出佢極有內涵，呢種內涵仲係經過長久歲月至培養出嚟，猶如書法第八段嘅認可資格。麻理惠氣質吸引，男人無有不愛，身材亦同樣深深將男人嘅目光吸引。阿妹擁有一副曲線玲瓏嘅34-24-35胴體，胸前嘅C奶亦甚有斤両，加上肌膚白而嫩滑，實在惹人睇到口水直流。
畢業於日本舞台藝術學院嘅麻理惠除咗舞蹈，特別係芭蕾舞有極高造詣，仲精通聲樂，而佢最叻就係吹單簧管，據聞阿妹佢小學嘅時候就已經吹得一流，故此成為熊本阿蘇郡少年合唱團其中一員。在學時期嘅舞台演出令麻理惠一心想畢業之後正式登上專業舞台，並以此為職業。由於阿妹佢由細到大都鍾意睇日本知名嘅寶塚歌劇團演出，所以未畢業就試過到寶塚歌劇團面試，可惜因為功課太忙兼準備不足，令麻理惠面試失敗。到2005年，麻理惠被星探發掘拍寫真，後來仲有機會到電視台工作，成為日本綜合性新聞節目《野次馬Plus》嘅天氣女郎，一做就係三年。成為天氣女郎嘅佢除咗練得一口上乘說話技巧，亦令佢接觸到好多演員同幕前工作，令麻理惠決心做個好演員，所以2009年阿妹就唔再報天氣，轉去拍電視劇同電影，作品包括電影《蒙面超人×蒙面超人Foze & Ozu MOVIE大戰 MEGA MAX》以及電視劇《檢事鬼島平太郎》等等。
甲斐麻理惠最鍾意一個人去旅行，而佢去到邊都會影相留念並放上博客同網友分享，想知道麻理惠最近又去邊度，就要留意佢個博客喇！
網址：http://ameblo.jp/k-marichan/
年齡：33歲
身高：5呎3吋
三圍：34C-24-35
撰文：賢