對於韓國歌壇，相信好多香港朋友都比較陌生，但佢哋啲女歌星個個畀人嘅印象都係人靚身材好，就好似今日要介紹嘅靚女鄭瑜莉，除咗唱功了得，性感嘅舞蹈亦令人眼前一亮。
今年30歲嘅鄭瑜莉，自小就好喜歡唱歌，所以童年嘅夢想係做歌星，18歲嗰年就出道，參加咗個歌唱比賽，仲攞到唔錯嘅成績。2001年出咗首張大碟，但成績未如理想。瑜莉勝在高頭大馬，上圍有36吋F，雖做唔成歌手，但要入娛樂圈絕對冇問題。瑜莉於是先做模特兒，為咗增加人氣，少不免做埋賽車女郎，着住性感制服，喺大熱天時烈日下搔首弄姿，起初瑜莉有少少「嬰兒肥」，所以一直都係陪跑，但佢既然入得呢行，就無理由認輸，於是積極瘦身減肥，一年唔到即時脫胎換骨，應大嘅地方變得更大，應細嘅地方變得更細，身材玲瓏浮凸，龍友們嘅鏡頭開始集中喺佢嘅身上，自此照片不停地被放上網，令佢人氣大增。
廣告同車展工作不斷，成為當年炙手可熱嘅新人，但瑜莉冇忘記自己嘅夢想，默默地為目標打拚！直至2006年，再有唱片公司睇上瑜莉，為佢出咗張EP，由於反應不俗，喺2008年再出個人專輯，今次一擊即中，更奠定咗瑜莉嘅歌壇地位。由於瑜莉喜歡美式舞曲，所以佢嘅MV中不乏性感歌舞畫面，有啲仲幾激吓，所以深受年輕人歡迎，而近年佢更遠赴歐美登台演出，睇嚟連外國宅男都被佢俘虜。喺中國歌星當中，身材夠火辣，又唱得跳得嘅，只有李玟，所以內地有網友就封瑜莉做「韓國李玟」，希望佢做歌星之餘，多啲拍性感寫真或者MV，咁我哋就可以大飽眼福啦！
簡介：呢個網站收錄不少鄭瑜莉嘅照片，由剛出道至今都有，部分嘅性感度極高，值得大家欣賞！
網址：http://myfavorites.jonai.net/Korean/Jung_Yuri/index.html
出生地：南韓
三 圍：36-25-38
身 高：172cm
撰文：龍四海