印象中嘅動漫展，一定係滿場十八廿二嘅索女，着上性感嘅動漫服飾，騷地展露完美身材。但有網友最近去美國紐約嘅一個動漫展，竟然失望而回，究竟乜嘢一回事？馬上為大家揭盅。
早前喺紐約舉行嘅動漫展，有眾多參展商出席，有內地網友抱着朝聖嘅心態去見識見識，心諗內地動漫展美女如雲，家陣喺美國舉行，美女理應更美、身材更火辣。佢哋事前亦計劃好晒攻略，先看廠商請嚟動漫代言，再睇騷女郎，最後就﹝目及﹞埋一眾嚟湊熱鬧嘅Cosplay美女，計劃可以話十分完善，但當佢哋喺現場一掃，就感到十分失望。每個廠商都搵嚟囡囡換上動漫服嚟做代言，但個個平均年齡都30歲以上。至於身材方面，有唔少上圍都好火辣，但腰圍、臀圍、手臂同大腿都一樣咁火辣呢！
至於騷女郎或者攤位女郎，網友話全部都係普通貨色，佢哋冇制服，冇化妝，連性感都欠奉，純為賣嘢而站場。網友話：「喺現場見到，真係連舉起部相機都費事。」至於另一個重頭戲就係追蹤現場嘅Cosplay女郎，網友話同樣深感失望：「真估唔到喺美國玩Cosplay嘅，都係中年人士！」無論男女動漫造型，十居其九都係中年人扮演，咁都唔緊要，最攞命就係無論男女都身材欠佳，英雄人物有個大肚腩，美艷主角就變成大肥婆，網友話都係支持內地嘅動漫展好過！
撰文：小德