香港影視圈有不少演員都係歌手出身，好似家陣最紅嘅「Cool魔」，當年出道時就係一名歌手。至於內地影視圈都有唔少相同例子，好似今日介紹嚟自湖北嘅著名演員樊錦霖，佢未做明星前原來係學音樂嘅！
樣子甜美，身材出眾嘅樊錦霖，小小年紀已經喜歡唱歌跳舞，而且還學習中外樂器，好似鋼琴就考到第十級，連難度好高嘅古箏，錦霖都識得，真係唔講得笑，中學畢業後更考入首都師範大學嘅音樂學院，主修表演系，期間連聲樂都學埋，所以好多朋友都以為錦霖畢業後，會參加啲大型歌唱比賽，攞個大獎後就投身音樂界，但錦霖竟冇參加任何大賽，反而走咗去拍劇，慶幸第一次出道就能與內地一級巨星張國立、張鐵林等合作，雖然只拍咗一個單元，但已經大過戲癮，自此令錦霖欲罷不能，決意放棄自己最強嘅音樂項目，改投演藝圈，一切重新學起。
經過多年嘅努力，錦霖現時係內地炙手可熱嘅演員，閒來無事，都會接拍雜誌硬照或平面廣告，以錦霖家陣嘅身份地位，接嘅都係名牌廣告，拍嘅都係時裝雜誌，但有時亦會興之所至，只要攝影師有需要，佢都會性感演出，而且一啲都唔錫身，講真錦霖身材高挑，加上三圍勻稱，應大嘅地方就大，應細嘅地方就細，只要稍稍性感就會有驚人嘅效果。由於錦霖主要都係拍古裝或民初劇，所以網友希望佢快啲拍時裝戲，到時就可以展露吓呢副完美嘅身材。
簡介：樊錦霖近年全力喺影視圈發展，所以攝影作品不多，但留存落嚟嘅每一輯作品都十分有睇頭，性感照更係熱力四射！
網址：www.moko.cc/fanjinlin
出生地：湖北武漢
三圍：34-24-36
身高：167cm
撰文：龍四海