每當提到天體度假村，好多人即刻聯想到法國，皆因當地出名多天體好去處。佢嘅天體文化歷史悠久，就連全球首間天體度假村，都係創立於法國，並已經有成63年歷史添！
首間天體度假村名叫CHM Montalive，位於法國西部嘅城市Vendays Montalive。呢間始創於1950年嘅度假村，甚至比國際天體聯盟早三年成立，堪稱創天體歷史嘅先河。家陣呢家擁有超過175公頃、超過1,000間供遊客租用嘅平房及260個露營熱點嘅天體勝地，已經成為全球天體愛好者嘅樂園！喺開設度假村前，呢度只不過係一塊爛地。據介紹，當年呢度經歷二次大戰嘅蹂躪，早已成為一塊荒廢嘅焦土。度假村創立人兼天體愛好者Christiane及Albert Lecocq，睇中呢度地方夠偏僻便同政府租用，從此成為全球首間合法嘅天體度假村。
雖然度假村攞正牌經營，但由於地方偏僻，一直冇乜人知道，而佢揚名之時便要數到成立3年後，國際天體聯盟喺呢度舉辦藝術節。呢個喺1953年舉辦嘅活動，吸引全球嘅天體愛好者嚟到，只係由於當年度假村規模相當細關係，好多愛好者自搭帳篷，從此令露營成為呢度嘅傳統，4年後更建立咗首個天體中心。家陣呢度唔單止規模相當大，而且仲設施齊備，除咗擁有滑水道嘅大型泳池外，蒸氣浴室、網球場、足球場、排球場、購物中心，甚至戲院等統統有齊，可以話係一個設施完善嘅天體社區。據調查指，每年嚟到嘅天體愛好者，有超過五成半人都係外國人，足見佢喺全球天體愛好者心目中嘅地位。
撰文：魂