以前澳門福隆新街妓院林立，除咗有不少妓女之外，妓院老闆仲收養咗一批「琵琶仔」，即係妓女培訓班嘅學員作為後備，佢哋唔係被家人就係被拐子佬賣嚟，年紀小至六七歲，大至十六七歲，從小就要學琴棋詩畫，係佢哋嘅必修基本功，事關十零歲開始，就要負責喺包房內彈琴獻唱，賺取客人嘅打賞，如果唱得唔好，飯都冇得食，由於佢哋年紀細，所以法例規定不能陪酒侍客，所以只能唱歌娛賓。有人問點解佢哋叫琵琶仔，坊間有好多傳說，有解釋琵琶仔就係未熟嘅琵琶果，外表唔靚，仲係皮包骨，食落更酸中帶澀。由於佢哋係嚟學習做妓女，所以會跟住一個阿姐，一來學嘢，二來做埋妹仔，至於將來呢個琵琶仔道行如何，能否交出成績，就要看師傅有冇料到。好多當年嘅紅牌阿姑，花國名妓，小時候都係跟過一啲大師傅，才可以揚名立萬。