好多模特兒原先都係做其他崗位，但突然機會出現，佢哋部分有心，但亦有不少係無意地闖入娛樂圈，好似今日介紹嚟自黑龍江嘅楊菲菲，未入行前係幫模特兒化妝嘅化妝師，點知一個機會，自己就成為人氣模特兒。
年輕時又高又瘦嘅楊菲菲，點都估唔到會做演員同模特兒，就算高中畢業後，輕鬆考入北京電影學院表演系，都對自己嘅前途冇乜信心，因為其他同學能歌善舞，表演經驗豐富，但佢乜都冇，自信心自然大打折扣，所以佢專攻演藝化妝，希望幫同學們扮靚靚。由於手藝一流，畢業後就全職做化妝師，後嚟機會嚟啦！有次拍攝因模特兒失約，菲菲就被臨時拉伕頂上，唔知係咪見慣場面，一出場就氣勢逼人，拍攝過程自然駕輕就熟，出嚟嘅效果一啲都唔差。一直以為自己係醜小鴨嘅菲菲，已經變成了人見人愛嘅白天鵝，自此轉戰模特兒界！
成功轉型後，菲菲拍過不少雜誌同廣告硬照，佢最難忘一次就係着三點式去高爾夫球場拍攝，當時十二月，氣溫只有零度，仍然要以比堅尼示人，過程吃盡苦頭，但自此菲菲竟愛上打高球，家陣佢嘅球技喺模特兒界都算數一數二。誤打誤撞嘅仲有踏入影視界，菲菲喺模特兒界係炙手可熱紅人，但喺影視界就不見經傳，有次佢參與《非誠勿擾2》嘅拍攝，飾演孫紅雷同姚晨嘅朋友，講真當中美女演員一籮籮，但就爆紅到佢，又係意料不到嘅事。最近好事又嚟，就係有機會做女主角，所以唔好睇小自己，機會到來就會順風順水！
簡介：菲菲出道日子尚淺，所以攝影作品真係唔係咁多，八成都放晒落呢個網站，當中不少超性感寫真，值得捧場。
網址：www.moko.cc/yangfeifei
出生地：黑龍江
三圍：33-22-34
身高：168cm
撰文：龍四海