如果係六十後以上嘅朋友，一定記得澳門著名賭場頂樓，喺八九十年代，有一個兒童遊樂場，裏面設咗好多機動遊戲，例如碰碰車或者旋轉木馬等，當然唔少得波子機同第一代街機啦！有啲似家陣嘅「冒×樂園」，好多親子遊嘅朋友帶小朋友上到天台，換一袋代幣畀佢哋之後，就會走返落去賭場搏殺，而呢度每個遊戲設置，最少都要兩個代幣至有得玩，而一個代幣就要兩蚊港元，即係打鋪機都要四蚊，喺當時都算高消費，而大人為咗可以玩兩手，都唔爭在花一百幾十等小朋友先玩個痛快。以前商場位置未成為花街，唔少喺附近別墅搵食嘅囡囡，一得閒都會跑上嚟遊樂場，一來可以自己輕鬆吓，二來可以喺度碰碰運氣，因為好多時帶小朋友上去玩嘅都係爸爸，啲囡囡稍稍拋個媚眼，就會換袋代幣畀小朋友去玩，自己就跟囡囡去附近別墅玩大人嘅「機動遊戲」，咁嘅親子活動，係當年澳門至有。