澳門Style：銀魚乾蒸水蛋

澳門嘅手信，除咗蛋卷同杏仁餅外，原來仲有魚乾，事關澳門臨近珠江口，正處鹹淡水交界，呢度魚量豐富，各式各樣嘅魚仔，更係多不勝數。個人最喜歡就係嚟買銀魚乾，用少少油鹽清蒸，真係好食到不得了，加上銀魚含極豐富蛋白質同鈣質，據講能增強體質。最近喺金池桑拿，就有味小菜叫做「銀魚乾蒸水蛋」，銀魚乾加雞蛋，使唔使咁補呀？諗起都食指大動，未揼骨前就問定廚房今晚有冇？廚房話準備好晒，一出嚟大廳，熱辣辣嘅「銀魚乾蒸水蛋」就出現眼前，啲雞蛋味好濃，睇嚟係用農場蛋，加上銀魚乾嘅香味，一食入口，魚香味更濃，原來師傅用咗浸魚乾嘅水嚟蒸蛋，難怪雞蛋吸收晒魚乾嘅香味，啖啖充滿海鮮嘅味道。啲魚乾至好嘢，由於鹹味變淡，食出銀魚本身嘅鮮甜味道，真係絕配，一連食咗三碗大飯，體力又再次回復，正到冇嘢好講呀！