有劇情輔助嘅三級片特別好睇兼引人入勝，但係好多人就覺得呢類片太過做作，對白亦冗長，應該以簡單對白、鏡頭及角色互動嚟交代劇情，簡單而言，即係「咪講咁多，做啦！」事實上，要交代劇情，對白其實係咪咁需要呢？單靠直截了當嘅交歡動作又有冇效果呢？《情慾9歌》就話畀大家知係得嘅！
《情》嘅故事其實相當簡單，講述美國少女Liza去到英國留學，由於佢熱愛音樂，某日參加咗一個叫做《Black Rebel Motorcycle Club》嘅演唱會，邂逅青年人Matt。二人一見如故，瞬間就發展一夜情。之後，二人嘅戀情漸漸升溫，同樣熱愛音樂兼且喜愛沉浸於音樂會熱情氣氛嘅二人，經常相約睇音樂會，每次之後都會上床。一年之間，兩人一齊睇咗八場音樂會，進行咗九次性愛。最後，Liza留學一年之期屆滿要返回美國，至於Matt則遠赴南極探索，但係佢哋分手嘅原因並唔係分隔異地，亦唔係因事爭執，只係覺得激情都要有個終結。
全片劇情就係咁多？冇錯！片中只有男女主角二人演出，中間穿插音樂會表演，全片對白只不過係十幾句，不過細味一部戲其實唔使咁多對白，亦唔使咁多支線情節同人物。咁樣成套劇有咩值得細味呢？據導演指出，片中嘅九場性愛都係由男女主角打真軍演出，表達性愛嘅畫面毋須過分兼渲染淫穢，但喺過程當中加插音樂會嘅場面同音樂，則大大增加激烈感覺。另外，男女主角喺纏綿嘅時候表現出關顧對方嘅需要，唔使講你愛我、我愛你都一樣可以從表情上表達彼此有濃厚嘅愛意存在，呢啲咪叫做高手囉！
撰文：賢