模影模蹤:張梓瑗超紅新人王

一個人要紅起嚟,真係唔到你唔信,短短一兩年,接到嘅工作就已經係人哋四五年嚟嘅總和,而且愈做愈起勁,人氣同工作量有增無減,呢位模特兒界嘅「當紅炸子雞」,就係嚟自河北嘅冷艷美人張梓瑗。

耀眼新星

出道兩年左右嘅張梓瑗,自小就學習民族舞,到讀書時就轉學街舞,所以舞功底子深厚,至於音樂方面亦唔講得笑,識彈鋼琴外,亦識吹長笛。梓瑗高中後想考入北京藝術或電影學院,由於呢啲名校年年幾萬人考,要入真係唔易,只好轉讀北京服裝學院主修演出系,做模特兒絕對係學以致用。以張梓瑗嘅質素,話咁快就成為校花,艷名遠播,未畢業已經備受重視,後來參加多項選美或模特兒比賽,每戰必有佳績,令阿妹對未來充滿信心,一畢業就全身投入工作。

紅得有理

短短幾年,張梓瑗已經接拍超過十五份雜誌攝影,近三十個商品廣告,出席展覽或做代言工作更不計其數,以新人嚟講,有咁嘅成績已經唔容易,最勁就係除咗做模特兒,佢仲參與埋影視拍攝工作,例如有份參與吳奇隆主演嘅電視劇《步步驚心》,電影則有同王晶合作嘅《無價之寶》,即係張栢芝同囝囝合作嗰部呢!此外仲出席大大小小電視及網站節目,紅到咁樣,唔到你唔服。雖然人氣高升,梓瑗仍然努力工作,特別係拍寫真,佢嘅火辣照片差唔多隔一兩個月就有一批推出,而且次次有驚喜,你話粉絲們點會唔支持佢,絕對紅得有道理。

張梓瑗Profile

出生地:河北

三圍:33-23-34

身高:167cm

撰文:龍四海