今日係端午節，相信大家就算唔去游龍舟水，亦會留喺屋企一邊涼冷氣，一邊欣賞龍舟競渡喇。見到龍舟細細隻，小弟就會聯想到同佢咁上下大細嘅舢舨，更令我諗起九十年代一套充滿香港獨有漁村風情嘅經典情色片《舢舨92》喇。
故事發生於一條寧靜嘅漁村，貌美少女阿嬌（飛鳥珠美飾演）同父母經營士多仔，生活得相當安穩，仲有個細佬讀緊大學添。可惜好景不常，佢阿爸患病臥床，搞到生計出現問題。呢個時候，村入面一個貪圖阿嬌美色已久嘅麻甩佬長旺就向佢提親，為咗賺呢筆禮金幫補家計，嫌長旺粗魯又猥褻嘅阿嬌只好答應。大婚當日，同阿嬌早已互生情愫嘅士多夥計阿華，知道以後都好難喺埋一齊，於是偷偷地同阿嬌交歡，要長旺未結婚就戴定綠帽。可惜，事件畀長旺發現，更加鬧到鄉公所，最後將阿華浸豬籠，至於阿嬌雖然唔使死，但係就要飽受長旺日夜折磨。
另一邊廂阿嬌嘅好姊妹帶金（光友子飾演）就畀人騙財騙色，同阿嬌雙雙陷於痛苦之中。此時，長旺嘅一個朋友阿文為咗搵寫作題材而來到家中作客，漸漸同阿嬌發生感情，仲發生埋關係。某日，好事被長旺撞破，而阿文同長旺糾纏期間，長旺畀阿嬌錯手殺死，最後只好同阿文坐船潛逃。《舢》片有幾幕艇上激戰，香港觀眾相信睇得幾投入，而片中嘅兩位女角都係日本AV女優，三點盡露，美色誘人，最重要就係床戲表情十足，令電影鹹味濃烈。
撰文：賢