唔知係咪人大咗，冇咗以前十零廿歲，可以終日嘻嘻哈哈嘅活力，同時亦覺得其他人呱呱嘈有煩躁之感，所以家陣小弟同班兄弟落酒吧消遣，多數都會揀間有格調又豪華，最重要係唔會嘈喧巴閉嘅酒吧，如果大家都好似我咁諗，澳門呢間御苑就啱晒喇。位於酒店入面嘅御苑，聽個名好似富貴屋苑咁，入到去之後，大家都會同樣希望住落嚟，事關酒吧之內嘅裝修美輪美奐，格調高雅又高貴，牆壁上鋪滿貴氣瓷磚，而四周嘅枱、椅亦係又靚又舒適。至於品嘗美酒方面，客人一落柯打，就可以見到專業調酒師，於極具氣派嘅酒櫃同吧枱之中表現調酒絕技，令客人飲都飲得特別歡暢！