模影模蹤:松井繪里奈離家尋夢

早前一段新聞話有個會考9A狀元放棄高薪厚職,追逐自己嘅巴士夢,轉職做巴士司機,係就係好多人覺得可惜,但係我就覺得能夠追夢不知幾咁瀟灑幾咁浪漫。而水着女優松井繪里奈就係因為要追尋明星夢,當初至決定離家出走!

清新甜姐兒

家陣人人都追求健康,進食要少鹽、少糖、少油,食物仲要新鮮,最好仲要係有機。其實,健康生活唔單只係注重飲食,睇寫真亦可以感覺健康,例如欣賞散發陽光氣息嘅日本水着妹,好似松井繪里奈咁就Fit晒喇!25歲嘅繪里奈出道於2004年,樣子甜美清新又可人,一見到佢就算心情幾咁憂鬱都即刻開朗晒。除咗甜美笑容吸引,阿妹嘅身材亦有其獨特魅力。雖然繪里奈嘅上圍尺碼低過水着妹平均水平,甚至可以話接近「赤貧」程度,不過勝在條腰夠幼,玉臀亦大小適中,加上白滑美肌以及識得擺S形姿勢,睇落一樣有曲線美。

決心成名

繪里奈現時喺藝能界算有番咁上下名氣,而佢當初唔係以拍攝水着寫真為主,而係女子組合「LindaLinda」嘅成員,曾經推出過音樂CD,正好符合其意願亦冇白費一番苦心。阿妹話嚟到東京發展經歷過一番掙扎,先係同父母發生爭執,繼而下決心離家出走,以追尋自己嘅歌星夢!可能因為佢有咁大嘅決心,加上本身美貌過人兼且演出用心,所以喺2006年奪得「Miss雜誌2006」嘅SEGA獎以及「Miss Tokyo 一週獎」。另外,阿妹發展歌唱事業亦頗如意,佢以Erina名義主唱嘅歌曲《Bird》喺2011年被選為《機動戰士 UC》第四季嘅主題曲,開拓動漫迷市場。

個人博客

松井繪里奈家陣主要以歌手身份活躍於藝能界,想知道佢近期又去邊度演唱以及有咩新歌,可以留意佢個博客。

網址:http://ameblo.jp/matsui-erina/

松井繪里奈Profile

年齡:25歲

身高:5呎3吋

三圍:33-23-30

撰文:賢