九十年代，本地嘅三級片盛極一時，除咗因為有好多高質索女肯脫之外，幕後一眾優質導演同編劇當然亦功不可沒，就好似我嘅偶像王晶咁。由王晶監製嘅情色片《玉蒲團之玉女心經》，除咗劇情有起承轉合，仲有強勁演員陣容，堪稱一代經典！
《玉》片講述，西門堅（徐錦江飾演）係個好色惡霸財閥，膝下有低智商兒子西門龍，亦有一個女叫西門柔（李麗珍飾演）。西門柔本住求學之心，決定女扮男裝去書齋返學。西門堅擔心佢畀人食咗隻豬，於是逼佢着上有機關嘅貞操帶至放行。
西門柔讀書期間，同一個叫做花道嘅男同學相當投契，而花道某次就知道佢係女兒身，想將佢佔有。但係佢唔知道西門柔條貞操帶有機關，其寶貝就咁被切斷。為咗重振雄風，佢同西門柔去搵造化道人進行接駁寶貝手術，期間就遇到魔女幻姬。另一邊廂，西門堅就幫個仔搵到個老婆小翠（舒淇飾演），而娶咗佢過門之後，怪事連連，西門堅嘅眾位妾侍都被吸乾精元，後來西門龍更加跌落山而死。
西門堅雖然傷心，但係亦不忘佔有秀色可餐嘅小翠，可惜，最後發覺小翠正係雌雄同體嘅魔女幻姬，慘被吸到精盡人亡。再另一邊廂，鐵血捕頭鐵中棠追捕幻姬，決戰之中身中春藥毒箭，而西門柔則及時以身相許免得佢爆陽而死，不過後來鐵捕頭都係死於幻姬嘅暗算。
最後，西門柔為報全家滅門之仇，以及除魔衞道，同幻姬展開床上決戰。由於西門柔之前無意中睇過玉女心經，得知邊個有高潮就邊個先洩氣，於是就咬實牙關忍耐，最後成功令幻姬高潮迭起，洩盡精元而死。《玉》片劇情出色，當中有唔少電影作品嘅影子，例如西門柔女扮男裝就似《梁祝》、鐵捕頭就似《倩女幽魂》嘅燕赤霞，雖然係「參考」，但係就令劇情集百家之大成，加上珍妹同舒淇兩個嘅忘我演出，三點盡露夾招招到肉，令情慾場面誘人之極，實在太經典太好睇喇！
撰文：賢