喺歐洲近年流行「裸滑」，即係裸體滑雪，早期啲健兒真係一絲不掛，喺冰天雪地滑雪，後嚟因為出現多次意外，至着番條泳褲咋！最近俄羅斯嘅西伯利亞就有過千人齊齊裸滑，仲希望打破世界紀錄添！
4月23日喺俄羅斯嘅西伯利亞，萬山遍野被冰雪覆蓋，一群「裸滑」發燒友就唔怕凍，決定聚首一堂，搞個大型「裸滑聚會」，約好喺庫茲斯巴山呢個滑雪場見面，起初有五百多人報名參加，但到咗當日竟出現成千人，加埋觀眾，逼到滑雪場人山人海，令大夥兒更加興奮，一於齊齊剝光豬上山滑落嚟，並希望將呢個創舉申報健力士世界紀錄。大家記得德國同奧地利嘅裸滑聚會，最多都係百零人出席，但今次竟有過千人參與，絕對係一個壯舉，但關鍵係成千人係咪全部都肯剝光豬先，事關冰天雪地，唔係個個都有決心喎，冷病咗就唔好啦！
當日天文台仲話會陰陰天落雨，氣溫大約十度以下，但一眾發燒友仍然無懼風雨，毅然出席，點知去到現場天公作美，太陽出嚟，氣溫上升到十八九度，一眾發燒友自然剝得更徹底，二話不說，個個泳衣或短褲示人，有啲美女仲裸露上胸，即時波濤「胸」湧，加上俄羅斯嘅裸滑發燒友都比較年輕，唔似其他地方好多都係中年男女，所以相比起來更有睇頭，成千人緩步上山，大會負責人一聲令下，眾裸體男女一滑而下，真係何其壯觀，如果佢哋年年都搞呢啲活動，相信呢個滑雪場定會成為旅遊熱點，幾凍都有人嚟湊湊熱鬧。